Assam : CM leh Japan Justice Minister in hmu

Japan tlawha zin mek, Assam chief minister Himanta Biswa Sarma chuan nimin khan Japan state minister of justice, Komura Masahiro a hmu a, Assam sorkarin Japan company-te puala an state-a industrial park siam a tum chungchang a sawipui.

Chief Minister Sarma leh Japan Minister Masahiro te hian India leh Japan inthlunzawmma neih chungchangte sawi dunin, inzawmna ṭha leh nghet zawk neih theih an duh thute pawh an sawi. Assam-in industrial park a siam tum hi state economy ṭhan lenna atan leh, ram pawn lama sumdawnna huang zauhna atana a pawimawh thute a sawi bawk. Assam ṭhalai, thiamna ṭha tak tak neite chu Japan-in hnathawktu a mamawh mekah pui theitu tur an nih thute Assam CM hian a sawi a ni.

Assam CM hi Advantage Assam 2.0 Roadshow nei turin South Korea leh Japan ramah a zin a ni. South Korea tlawh hmasain, sector hrang hranga stakeholder te meeting a neihpui a ni. Nilaini khan Japan hi a pan a, Tokyo a thlen hnuah Advanvate Assamn 2.0 Roadshow hi nei leh nghalin, sumdawn mi 160 chuangte nen hun an hmang ho.

Sarma hian nimin vek khan Japan land, infrastructure, transport and tourism minister Furukawa Yasushi pawh a hmu bawk. Meeting-ah hian an state-in tourism lama theihna a neih hrang hrangte sawiin, Assam leh Japan inkara tourism lam chawi lar a nih theih dan turte an sawidun. Sarma chuan an state tlawhtu, Japan mite tana hmun tlawh tur hmingthang tak tak an neihte pawh sawiin, Charaideo Moidams, Kaziranga National Park, tea garden, golf course leh hmun dang hrang hrangte a sawilang a ni.