Hmarchhak-ah Airline passenger pung

Hripui leng vanga hun rei tak chawlh tir an nih hnuah thlawhtheihnate an service leh tawh a, hmarchhak bialah thlawhtheihna hmanga zin veivak pawh an pung chho leh mek tih Airport Authority of India (AAI) chuan a sawi. 

AAI official-te chuan Guwahati-a Lokpriya Gopinath Bordoloi Inter­national Airport-a July 10-a airline passenger ziah luh zat 2,812 an awm laiin, September 10-ah chuan 5,924 an awm tawh a, passenger punna hi 111% a tling. 

Agartala airport-ah pawh khualzin punna hi 104% niin, Assam-a Dibrugarh airport-ah 126% leh Imphal airport-ah 66.5% in an pung tawh bawk. 

AAI officiating Regional Executive Director JT Radhakrishna chuan hmarchhak-ah thla tinin khualzin vei vak an pung chho zel tih a sawi a, hetihlai hian hripui leng avangin ram chhunga airline service chu 50% dawnin a la tlem ti a sawi. Thlawhtheihna hmanga zinte tana khuahkhirhna hrang hrang siamte pawh thlahdul chhoh zel a ni a, hei vang hian khualzin pawh an pung chhoh zel leh, thlawhtheihna service zat pawh dan pangngai anga  neih chhoh theih thuai an beisei thu a sawi bawk. 

UDA scheme hnuaiah hmar­chhak bial tana air connectivity tihchangtlunna turin November thla laihawl aṭangin regional airline thar, 'FlyBig' chu hman tum a ni bawk. AAI official-te chuan UDAN 4.0 programme hnuaiah Civil Aviation Ministry-in route 78 a pawm zingah hmarchhak bialah route 40 a awm tih an sawi.

ATR-72 type aircraft chu Guwahati-Passighat (Arunachal Pradesh), Guwahati-Tezu (Arunachal Pradesh)-Imphal leh Tezpur (Assam)-Lengpui (Mizoram) route-ah thlawh tir an ni dawn a ni, an ti.