APCC-in Larsap laka lungawi lohna lantir tum

Assam Pradesh Congress Committee (APCC) chuan Governor PB Acharya laka lungawi lohna lantir nan, nawrh huaihawt a tum.

Governor Acharya chuan kar kalta Inrinnia Silchar-a public meeting a neih ṭumin, Congress party chu sawiselin, hmanlaia India ram awptu Mughal lal leh British mite aia India ram suam nasa zawk an ni, a ti.

APCC chuan Acharya chu Assam Governor post zahawmna tichhetuah puhin, Bharatiya Janata Party (BJP) agent anga awmah an puh bawk. Hemi chungchangah hian APCC unit te chuan an awmna district tina Deputy Commissioner (DC) te kaltlangin President Pranab Mukherjee hnenah complaint thehluh an tum bawk.

Hetihlai hian APCC chuan eiruk thubuai awrh mek, Indian Premier League (IPL) Commissoiner hlui Lalit Modi rampawna zinchhuah phalna pek a nih chungchanga inhnamhnawih, External Affairs Minister Sushma Swaraj chu ban an phut thu an tarlang bawk.

APCC vice-president Ripun Bora chuan Governor Acharya an puhna chungchangah APCC-in report buatsaih thuai a tum thu a sawi a, Governor chu Dibrugarh University court leh executive council member atana Rashtriya Swayamsevak Sangh (RSS) mi leh sa ruata an puh thu leh Dibrugarh University chancellor a nihna hmang sualah an puh bawk a ni.