ATSUM-in tiam chin awm loin kawngpui dangchat

All tribal Students’ Union Manipur (ATSUM) chuan June 22 zan aṭang­in Manipur-a kawngpui, National Highway pathum danchah an tum thu Pathianni khan a puang.

ATSUM chuan state puma national project kalpui mekte dan an tum thu a puang bawk.

National Highway dan turte hi NH-2 (Imphal-Mao), NH-37 (Imphal-Jiribam) leh NH-150 (Imphal-Churachandpur) te an ni.

State sorkarin an thil phut a tihpuitlin theih loh avangin kawngpui dan chah an tum thu ATSUM thuchhuak chuan a tarlang a, Chief Minister Ibobi Singh hnenah April 13 khan thutawp an thlen tawh thu leh an thil phut tihpuitlinna atan June 14 thleng hun an pek thu a tarlang.

ATSUM hian Manipur tlangram bial chhunga contract lecturer 286 leh Adhoc teacher 333 te tihngheh phutin nawrh an lo huaihawt tawh ṭhin a ni. An thil phut zingah Schedule Tribe Commission din, Imphal-a Jawaharlal Nehru Institute of Medical Sciences Hospital-a ST seat leh state Legislative Assembly Secretariat-a ST seat hnawh­khah te a tel a, tlangram bial tan Addi­tio­nal director awmna, Education depart­ment hran siam an phut bawk.