Rijiju-a'n hmarchhak mite inkarah Inhuatna a thlen: AP Congress

Arunachal Pradesh Congress Committee chuan Union Minister of State for Home Kiren Rijiju chu hmarchhak mite inkara inhuatna thlentuah a puh.

APCC vice president TC Tok chuan thuchhuah a siamah Arunachal BJP te chu sawiselin, "State BJP hotute chu sorkar laipuiin state ṭanpuina fund a pekte chu titawp turin Delhi-ah an campaign a, harsatna belchhah nan MoS for Home Affairs Kiren Rijiju chuan state chhunga mipuite chu bitumin, an rilruah hlauhthawnna neihtir an tum a, anni hi firfiak pawl chu an ni," a ti.

Tok chuan Naga hel, NSCN (K) leh sorkar laipuiin inkahhai thuthlung an tihtawp chhanah Rijiju chu a puh bakah Arunachal-a Armed Forces (Special Powers) Act, 1958 (AFSPA) lekkawh chhanah a puh bawk.

"NSCN (K) leh sorkar laipui chuan Central-a NDA sorkar hnu leh Rijiju-a Union Minister nih hnuah inkahhai thuthlung an tihtawp a, hei hi Rijiju-a'n hmarchhak biala inhuatna thu thehdarh a tumna hmanrua a ni. Hmarchhak bial remna leh muanna tihchhiat tumin hel pawl a hmang a, Arunachal-a boruak muanawm tihchhiat nan BJP member te a hmang a ni," a ti.