China palaiin Sikkim CM a hmu

India rama China palai, Le Yucheng chuan Pathianni khan Sikkim Chief Minister Pawan Kumar Chamling a hmu.

Ambassador Yucheng hian Sikkim aṭanga Nathula Pass kaltlanga Tibet, Kailash Man­sarovar-a biak zina kal tumte hmuh tumin Sikkim a tlawh a ni. Biak zina kal tumte pualin Nathula Pass hi nimin khan hawn a ni.

China palai hian Nathula Pass kaltlangin Chinese official dangte nen Tibet ram an lut ang a, India aṭanga biak zina kalte hi a lo dawngsawng ang.

Sikkim Chief Minister nen an inkawmnaah Yucheng chuan Sikkim-in tourism lamah hma lam hun duhawm tak a neih thu sawiin, China investment lo dawngsawng a, ram hmasawnna kawnga intlansiaknaah Sikkim chu a tel ve theih thu a sawi.

India leh China thawhhona kawngah beiseina sang tak a neih thu sawiin, ram pahnihte inlaichinna chuan hma a sawn zel thu leh hmasawnna tura ram pahnihte hmalakna chu mipuite'n an chhawr ṭangkai ngei a beisei thu a sawi bawk.

Chief Minister Chamling chuan Nathula Pass hawn a ni leh ta chu lawmawm a tih thu sawiin, Sikkim mipui aiawhin China sorkar leh sorkar laipui chunga a lawm thu a sawi.

Chamling chuan kumin kum tawpah chuan Sikkim thlai tharchhuah chu organic vek a nih tur thu a sawi bawk.