Tripura CM A insawifiah

Tripura Assembly of Journalist-in an state chief minister Biplab Kumar Deb chu media mite sawisel leh vauna thu a sawi chungchang sut tura ni thum hun an pek a zawh hnuah, Thawhlehni khan Deb chuan Sabroom-a thu a sawinaah midangte vau zawnga thu a sawi loh thu a sawi. A thusawi chu mipuite thu dik lo leh kawng dik lo a hruai an nih theihna tur laka venna a ni tih a tarlang. 

Deb hian Thawhlehni zan khan Tripura Electronic Media Society-a journalist-te kawmin, media mawhphurhna chu sorkarin kalphung dik tawk lo pholante a nih rualin, a ni lo zawnga mipui rilru hruaikawina atana hman a nih chuan pawmzam mai chi a ni lo, a ti. 

CM hian  an state-a Covid-19 leng mek chungchanga sorkar hmalak dan chu chanchinbu ṭhenkhatin dik tawk loa tarlangin,  mipui an tichiai niin a sawi. Kar liamtaa Sabroom-a thu a sawinaah hei hi sawi chhuakin, heng mite hi a ngaidam thei dawn lo tih a sawi a ni. CM-in media mite sawisel a, a vau hnu hian state chhungah journalist pahnih chu mipuiin kut an thlak niin Tripura Assembly of Journalist chuan a tarlang. 

Hetih lai hian hri leng dona kawnga sorkar hmalakna fel tawk lo nia media lama report a nih avangin, Tripura High Court chuan state sorkar hnenah hriattirna a pe a, tun kar chhung ngeiin hri leng mek chungchanga thil thlen dan dik tak chu ziaka thehlut turin a ti a ni. 

Hri kai hmuh tawh zat, district tina hri kai awm dan, coronavirus treatment centre siam a nih dan, hri kaite enkawl an nih dante kimchanga taka thehlut turin a hriattir.