Manipur : Ruihhlo kg 314 hal ral

Manipur chief minister N. Biren Singh leh police te chuan Inrinni liam ta khan Lamdeng khua, Imphal West-ah ruihhlo kg 314 an hal ral.

Ruihhlo an hal ral hi heroin powder kg 9.844, brown sugar kg 244.409, pseudoephedrine gram 505 leh ganza kg 32.280 te an ni a, Shija Common Bio-Medical Waste Treatment Facility-ah hal ral an ni.

Chief Minister Singh chuan state sorkarin ruihhlo do kawnga hma a lak dan te, opium chinna hmun sang chuang an tih chhiat tawh thu te a sawi. Ruihhlo Rs vbc 70,000 man hu an man tawh thu leh, hemi lama inhnamhnawih mi 2,000 aṭanga 3,000 an man tawh thu te, an zinga mi 200 chuang chu thiam loh chan tirin lung ina an tan thu a sawi bawk.

CM chuan sorkarin kum 2018 khan 'War on Drugs' kalpui ṭan a nih thu leh, tun thlengin ruihhlo do hna an la kalpui thu a sawi. An thil tum ber chu ruihhloa inhnamhnawihna nei zawng zawngte hneh a tihchhiat a ni tiin, opium chinna hmun pawh tih chhiat chhunzawm zel a nih tur thu te, highway-a ruihhlo tawlhru leh zuar ṭhinte dap beihpui an thlak chhunzawm zel tur thute a sawi. Hei hi ṭhalaite nun chhanhimna tur a nih thu CM Singh chuan a tarlang.

Ruihhlo do kawnga hma an sawn theihna atan tualchhunga pawl ṭhenkhat, Meira Paibis leh social worker-te puihbawmna leh thlawpna an dawng bawk a ni.

CM Singh chuan 'War on Drugs' chu campaign mai ni loin, hma hun lo awm zel tur atana lo in ven lawkna a ni, a ti. Manipur chu ruihhlo awm lohna state a nih theihnan inlungrual taka ruihhlo do turin mi zawng zawng a sawm thu a social media X ah a tarlang a ni.