Assam : ULFA(I)-in Guwahati-ah IED ti puak

Assam-a dan pawna hnawl United Liberation Front of Asom ( Independent) chuan Pathianni, Republic Day khan Guwahati-ah bomb chak lo chi an ti puak. Hei hi India mipuite hnena hriattirna an pekna a nih thu an sawi.

Improved explosive device (IED) chi Assam state hmun hrang hrangah an kam tih sawiin, mipuite tih nat tumna erawh a ni lo an ti thung. An bomb kam zing mi hi Guwahati hmun hnihah a puak a, a puak erawh a na lo. Pakhat hi Beharbari vengah puakin, pakhat dang hi Inter-State Bus Terminus bulah a puak. Police-te chuan he thil thleng hi chhui chian mek a nih thu an sawi.

ULFA (I) hi Paresh Baruah kaihhruai a ni a, China-Myanmar ramria an inkhuarna chu Bangladesh-ah sawn an tum nia sawi a ni. Remote control hmanga bomb an tih puahte chu India sorkar hnenah eng nge an tih theih tih lantirna mai a nih thu an sawi bawk.

An pawl thupuangtu,second lieutenant Ishan Asom chuan, "Bomb puak na vak lo, mihring tana hlauhawm pha lo kan ti puak a ni. Heng bomb kan kamte hi venhimna khauh zawka kalpuina hmunah pawh kan duhdana kan chet theihzia tilang tu a ni," a ti.

Hmarchhak bialah hian ULFA(I) leh dan pawna hnawl pawl dangte hian Independence Day leh Republic Day vuakvetah hian an thil phut lantirna leh nawrna turin pawi khawihna an lo thlen fo ṭhin a ni. Kum 2004, August 15 khan Assam-a Dhemaji khuaa bomb puakah mi 13 an lo thi tawh a, heng zingah hian Independence Day lawmnaa kal naupang 10 an tel a ni.