APSC buaina: India President chauhin chairman ban thei

Assam Public Service Commission (APSC) buaina chu Chief Minister Tarun Gogoi-a'n Additional Chief Secretary chhui chiantir tum mah se rah ṭha a chhuah ang em tih a chiang lo.

India danpuiah President chauhin State PSC chairman leh member te hi a ban thei a, hetihlai hian state sorkar hian APSC hna lak dan chhui chiang tur hian official notification a la chhuah lo.

India danpui Article 317 chuan President hi State PSC chairman leh member te ban theihna a pe a, chairman leh member te chuan thil fel lo an ti a nih chuan Supreme Court-in ban an nih theih chhan President hnenah a report ang a, hemi hnu hian President chuan a ban thei a ni. Member leh chairman te suspend kawngah pawh he dan hi hman a ni bawk.

Public Service Commission member leh chairman te chuan office luah tlak lo khawpa an awm emaw anmahni pualin office duty piah lamah hlawh neia hna an thawk emaw a nih chuan President hian a ban thei bawk.

Hetihlai hian Assam sorkar official chuan India danpui tlawhchhanin State PSC chairman leh member a ruat thei tih a sawi a, mahse ban tur chuan President pawmpuina a lak a ngaih thu a sawi.

Assam sorkarin APSC chairman a ban dawn a nih chuan President hnena thlen hmasak a ngai dawn a, President-in a lo pawmpui chuan thil ṭulte bawhzui tur leh chhui chiang turin Supreme Court a hriattir ang, tiin official chuan a sawi.

State sorkar official chuan Chief Minister Gogoi-a'n Additional Chief Secretary a chhui chian tir dawn a nih chuan APSC chairman leh member te'n hna an lak danah thil fel lo an hmuhchhuah ngei a rinawm a, hemi hnu hian President hnenah an thlen leh dawn a ni, a ti.