Assam-a AIUDF MLA 7-in Congress zawm tum

Assam-a All India United Democratic Front (AIUDF) MLA pasarih chuan rorellai Congress sorkar zawm an tum.

Assam Pradesh Congress Committee (APCC) hotu chuan he thu hi sawiin, AIUDF MLA pahnih suspend te - Sherman Ali Ahmed leh Ataur Rahman Mazarbhuiya bakah MLA dangte chuan Congress zawm an duh thu an sawi a ti a, Congress party ticket-a 2016 Assembly inthlan chuh an duh a ni, a ti.

"Sherman Ali leh Mazar­bhuiya bakah Goalpara leh Barpeta district-a MLA pa­hnihte nen kan inbe mek a, AIUDF MLA zinga langsar ber te an ni. Party hruaitu Badruddin Ajmal kaihhruaina hnuaiah an lungawi loh avangin kan party zawm an hreh lo," tiin APCC office-bearer pakhat chuan a sawi.

AIUDF MLA pasarihte'n Congress hi zawm ta se, 2016 inthlanah party ticket pek an ni ang em tia thuthar thehdarhtute zawhna chu chhangin APCC hotu chuan, "Ṭhenkhat chu pek an ni ngei ang a, mahse an chak leh chak loh turah a innghat," a ti.

Kum 2011 state assembly inthlanah AIUDF hian seat 18 a la a, Assam Legislative-a Congress party rorelna hnuai­ah eptu party lian ber an ni. Hetihlai hian AIUDF chuan MLA pahnih- Sherman Ali leh Mazarbhuiya te chu party aṭangin a suspend.

"Kum 2016 inthlanah a bik takin Lower Assam leh Barak Valley bialah AIUDF chu kan party-in kan ṭhatpui ngei kan ring a, AIUDF MLA te hian nakkum inthlan hmaa kan party an zawm a nih chuan Badruddin Ajmal tan chhiatna a ni ang. AIUDF MLA te hian kan party ticket-a hnehna an chang thei a nih chuan eng nge buaina tur awm?" tiin Assam Congress party hotu chuan a sawi bawk.

Kum 2014 Lok Sabha in­thlan­ah Assam-a seat 14 aṭang­in Congress leh AIUDF hian seat thum ve ve an la a, BJP-in seat sarih lain, independent candidate-in seat khat a la.

Nakkum Assembly in­thlan lo awm turah Cong­ress hotu chuan ṭhalai lam an ngaihpawimawh thu sawi­in, All Assam Students Union (AASU) president hlui Shankar Prasad Roy leh general secretary hlui Tapan Kumar Gogoi te Congress party zawm tura an sawm thu a sawi. Manoj Baruah-a'n AJYCP aṭanga BJP a zawm theih chuan AASU hruatu hlui te pawhin Congress an zawm duh ngei a beisei thu a sawi bawk.