India mi 40% dikna chanvo rahbehsak an ni: SC judge

Supreme Court judge, Justice Tirath Singh Tha­kur chuan India rama mi za zela 40 chu an dikna chan­vo rahbehsak an ni, a ti.

Justice Thakur hian National Legal Services Au­thority (NALSA) chair­man hna a chelh mek a, India mihring tluk­lehdingawn 1.25 zinga 40% chu an dikna leh chanvo hmu lo an ni, a ti.

Heng 40% te hi below poverty line (BPL)-a awm an ni a, a tam zawk chu ziak leh chhiar thiam lote an ni. Ei leh barah an dinhmun a hniam hle tiin Thakur chuan a sawi bawk.

Heng mite tan hian NALSA leh State Legal Services Authorities te chuan legal service leh legal awareness an pek ṭhin thu a sawi.

"Dan angin judge te chuan dan lam thil an buaipui a, mahse pa chuan a fate chungah rorelna dik a hlenchhuah a ṭul a ni. Chutiang chiah chuan parliament-a roreltute leh MLA te pawhin an bial mipuite chungah rorelna dik an hlenchhuak ve tur a ni," a ti.

"Ka thil tum chu khaw­tlanga ngaihsak hlawhte ṭanpui a ni tur a ni. Rorelna dik lo vanga intluktlan loh­na te hi kan enliam mai tur a ni lo," tiin Justice Thakur chuan a sawi bawk.

Tripura High Court Chief Justice Deepak Gupta chuan tribal zinga 86% chu legal aid leh service an hrechiang lo tih a tarlang bawk.