Palatana plant-ah power MW 500 siam dawn

ONGC Tripura Power Company (OTPC) chuan Tripura-a Palatana power plant aṭangin power megawatt 500 siam a tum.

OTPC Managing Director Satyajit Ganguly chuan he thu hi sawiin, Northeast Regional Load Dispatch Centre (NRLDC), Shillong aṭanga phalna an neih hnuah tun thla tawp lam hian power plant hi an tihnun hman a beisei thu a sawi.

Power hmang turte chung­changah Ganguly chuan Palatana power project chu hmarchhak bial mamawh phuhrukna atana siam a nih angin hmarchhak bialah chauh pek chhuah an tum thu a sawi.

"Hmarchhak state te'n power an hmang lo a nih chuan Palatana power project hi a hlawhtling dawn lo a, fur a tlak leh tak avangin power mamawhna a tlahniam a, mahse OTPC chuan power chu hmarchhak bialah hralhchhuah a tum tho a ni," a ti.

Palatana plant tihnunna atana gas mamawh chungchangah Oil and Natural Gas Corporation (ONGC) chuan an inremna angin gas 2.65 Million Metric Standard Cubic Meter Per Day (MMSCMD)-a a supply thu a sawi.

"Gas supply kan dawn aṭang hian nitin power MW 530 kan siamchhuak thei a, mahse Palatana unit hi power MW 726 siamchhuak thei niin, hetiang zat siamchhuak tur chuan power mamawh erawh a sang a ni," a ti.

OTPC MD Ganguly chuan Manarchak power project pawh North Eastern Electric Power Corporation Limited (NEEPCO)-in a kalpui mek tih sawiin, NEEPCO hian power a siamchhuahte chu Tripura sorkar hnenah a hralh tur thu a sawi a, power an siamchhuah theih thuai a beisei thu a sawi.

Hmarchhak state sorkar te chuan power leina leiba ṭha­hnem tak an neih avangin OTPC leh NEEPCO hnen aṭangin power an lei duh ṭhin loh thu a sawi bawk a, mahse sorkar laipuiin Bangladesh-a power hralh tura ruahmanna a siam chu an beiseina a ni, a ti.