SC-in Swamy ngenna ngaihtuah dawn

Assam Karimganj district-a additional chief judicial magistrate court-in man tura thupek a tihchhuah chu BJP hruaitu Subramanian Swamy chuan Supreme Court-ah a khing.

Justice M.Y. Eqbal leh Justice Arun Mishra te awmna, SC bench chuan Swamy-a thu thlen hi pawmin, July thla chawlhkar khatnaah a ngaihtuah tur thu a tarlang.

Swamy hian March thla khan Guwahati-ah Muslim te biak-in, mosque chu sakhuana nena inzawmna nei lo, building satliah mai a ni a, a ṭul chuan eng lai pawha tihchhiat theih a ni, tiin a sawi. Hemi chungchangah hian Karimganj magistrate court chuan sakhaw hrang zuitute inkarah inhuatna thlen thei a ni, tiin thubuai a siamsak.

Magistrate court hian June 30 emaw a hmain emaw Swamy hi a hmaah inlan turin a hriattir a ni.

Swamy chuan Su­preme Court-in Infor­mation Technology Act, 2000 Section 66A hmansual a awlsam zia a tarlan angin Indian Penal Code Section 153(a) leh 295(a) pawh hmansual a nih theih a ni, tih tarlan a duh thu a sawi a, mi thusawi zawng zawngah Section 153(a) leh 295(a) tlawhchhana thubuai siam chi a ni lo, a ti.