Robita-i'n chaw nghei a titawp

Arambam Robita Leima-i chuan Manipur -a Armed Forces Special Powers Act (AFSPA) hlih a nih theih nana chaw nghei a kalpui chu, a chhungte ngenna avangin ni hnih hnuah a titawp leh.

Arambam Robita Leima hian Irom Sharmila-i hniakhnung zuia AFSPA hlih a nih theih nana chawnghei a kalpui ve tur thu a puang a, mahse pawl hrang hrang leh a chhungte chuan chaw nghei kalpui lo turin an ngen. Robita hian fa kum 10 leh kum li mi lek a pawm avangin chaw nghei kalpui lo turin mi tam takin an ngen a, a pasal ngei pawhin a thlawp lo niin an sawi.

Kum 32 mi, Robita-i hian August 13 khan chaw nghei a ṭan tur thu a lo sawi tawh a, police te chuan lain, thu an zawt chiang nghal a ni. Robita chuan chaw nghei a ṭan hma hian mi tam takin Sharmila-i'n kum 16 chhung zet chaw a nghei tawh hnua a tihtawp tur thu a puan an dem avanga chaw nghei kalpui ve tura thutlukna chu siam ta a nih thu a sawi.

Kum 2000, November thla khan Assam Rifles te chuan Malom-ah civil mi 10 an kaphlum a, hei hi duh loin Sharmila chuan AFSPA hlih a nih theih nana thih thlenga a beih tur thu a sawi. Kum 16 chhung chaw a nghei hnuah kum 2016, August 9 a titawp a, chaw nghei a titawp aṭanga ni li hnuah Robita hian chaw nghei hi a kalpui ve leh a ni. Mahse Robita-i hi a chhungte chuan chaw nghei kalpui lo turin nasa takin an nawr niin an sawi a, a pasal Konthoujam Hira leh a fate ngenna avangin chaw nghei chu a chawlhsan leh ta nia tarlan a ni. Robita hi Organisation for Indian Women Against Crime hruaitu hlun a ni.