Assam hi Tourism Hotspot-ah kan siam ang : Sonowal

Assam Chief Minister Sarbananda Sonowal chuan an state chu bio-diversity-ah a hausak avangin tourism hotspot-ah siam turin sorkar chuan hma a la dawn tih Nilaini khan a sawi.

Panchayat & Rural Development Department chuan Kamrup district-a Rangia-ah meeting an buatsaih a, he hunah hian he thu hi Sonowal chuan a sawi a ni.

Sonowal chuan, "Mihringte hi kan chheh vela nungcha leh ramngawte nen hian kan inlaichin a, an tel lo chuan kan nung thei lo a ni. Assam mawina chu thing leh mau ramngaw te hi a ni a, chu chu hriain sorkar chuan thing 150,000 phun turin ruahmanna a siam a ni", a ti. Lei luang ral nasa tak veng turin thing phun a ngai a ni, a ti.

"Assam hian leilung hausakna a nei ṭha tawk a, theihna pawh a nei. Boruak munaawm tak a awm theih na turin inpumkhatna leh in unauna kan mamawh a ni, he hi a hlawhtlin hunah chuan Assam chu khualzin te hiptu a la ni dawn a ni" tiin CM chuan a sawi a, boruak ralmuang tak awm nise Assam chu khualzin te tlawh chak berte zing a mi a nih thu a sawi.

Assam-ah hian khawvel huap pawha lang phak Kaziranga National Park a awm a, he hmunah hian khawvel ram danga hmuh tur awm zen lo nungcha eng emaw zat a awm a ni. Hei bakah hian park eng emaw zat a awm a, British lal fapa te nupa-in kumin kum tir lama India an tlawh ṭum pawhin Assam-ah hian hun eng emaw chen an hmang a, KNP-ah zan hnih an riak a ni.

Meeting buatsaih hi MLAs Bhabesh Kalita, Satyabrat Kalita, Emanuel Mushahary, Padhadikar, Srimanta Sankardev Sangha, Bhabendra Nath Deka leh Deputy Commissioner Kamrup, Vindo Seshan ten an hmanpui.