Chakma Tribal ten ‘Black Day’ hmang

Chakma tribal mi nuai 7.5 vel zet te chuan hmasang ata an chenna hmun Bangladesh-a Chittagong Hill Tracts (CHT), Pakistan sipai ten an chhuhluihna ni hriatrengna leh an duh lohna lantirin Nilaini khan ‘black day’ an hmang.

Chakma tribal zinga mi nuai 2.50 vel zet chu Tripura, Mizoram leh Arunachal Pradesh-ah te an cheng a, Bengaluru, Mumbai leh Delhi-ah pawh cheng an awm nual. A tam ber chu CHT-a khawsa an ni a, mahse he hmun aṭang hian nawr chhuahin an awm niin an sawi.

Chakma National Council of India (CNCI) secretary Santi Vikash Chakma chuan, "Hmasang aṭanga kan chenna hmun Chittagong Hill Tracts chu Pakistani army ten min chhuh sak a ni. August 17, 1947-a British awpna aṭanga India-in zalenna a hmuh khan mi zawng zawngin an lawm a, nimahsela Pakistani Army, Baloch regiment-te chuan kan ram min chhuh sak tumin min bei a, India flag pawh an pawt thla a, he ni hi Chakma te tan chuan ni duhawm loh ber te zing a mi a ni", tiin ‘black day’ an hman chhan a sawifiah.