Indian Air Force-in AP-ah ALG dinbelh

Indian Air Force chuan Arunachal Pradesh-a Pasighat-ah Advanced Landing Ground (ALG) a dinbelh leh a, hei hi India leh China inri-na aṭanga km 100 vel a ni.

Vawiin aṭang hian ALG hi hman theih tura beisei a ni a, AP-ah hian ALG pali-Mechuk, Ziro, Along leh Walong-ah te din a lo ni tawh.

Pasighat airfield hi kum 1962-a India leh China an indo khan hman a lo ni tawh a ni. Sorkar laipui chuan kum 2009 khan AP-ah hian ALG pasarih din tura rawtna chu a lo pawm tawh a, hemi atan hian cheng vaibelchhe 1,000 ruahman a ni. Ṭhenawm ram China chuan Tibet autonomous region-ah small to medium airfield 15 lai a din tawh a, ram pahnih te hi ramri chungchangah an innghirngho reng avangin, ram venhim kawngah kawng hrang hrangin hma an la mek nia ngaih a ni. Arunachal Pradesh-ah hian India leh China inri-na km 1,080 zeta thui a awm avangin sorkar laipui chuan ram himna tura a hmalakna chi khat a nih thu Indian Air Force chuan chuan a tarlang.

Hetih lai hian Mani-pur Chief Secretary O Nabakishore chuan Minis-try of Civil Aviation-ah lehkha thawnin Imphal airport chu international airport a nih anga tihchangtlun kawngah hma la turin a ngen. Imphal airport hi kum 2013 khann Ministry of Civil Aviation chuan international airport-ah a lo puang tawh a, a changtlung tawk lo nia tarlan a ni. Imphal chu Myanmar khawpui Yangon leh Mandalay, Thailand-a Chiang Mai leh Chiang Rai te bakah China hnaia awm a nih avangin a ṭangkai thei dawn hle niin Chief Secretary chuan a sawi a, tun aia changtlung zawka siam turin Ministry of Civil Aviation a ngen. Hei bakah hian Manipur-in tourism lama hma a sawn chak zawkna turin Imphal kaltlanga India leh South East Asia airlines thlawhtheihna chuan man titlawm turin rawtna a thlen bawk.