Assam-ah I-Day-a bomb kamtu naupang pahnih man

Assam-a Independence Day lawm ni-a hmun hrang hranga bomb puak kaihhnawih chhuina kal zelah, police-te chuan bomb kamtu naupang kum tlinglo pahnih an man a, an hming erawh puanzar a ni lo.

Police-te chuan heng naupang, kum 15 leh 16 te hi Thawhlehni khan Kakojan area-ah an man tawh a, a tirah mipui hriatah an puang zar lo niin Tinsukia district Superintendent of Police Mugdha Jyoti Mahanta chuan a sawi. SP chuan heng naupangte hi pawl kua leh pawl sawm zirlai an ni a, Kakojan school-a kal lai an ni, a ti. August 11 khan heng naupang pahnihte hi United Liberation Front of Assam (Independent) (ULFA) te kaihhruaina hnuaiah Laipuli, Budlabeta Tea Estate (No 6 line), Sokreting TE (No 8 line) leh Doomdooma bypass RCC bridge-ah te bomb hi an kam tih SP Mahantam chuan a sawi.

Bomb-te hi Independence Day hma ni li la awmah kam lawk niin, naupangte hi motorcycle hmangin heng hmunah te hian kal kualin an kam a ni. ULFA-I te hian naupang te hi Morigaon, Jorhat, Golaghat leh Sivasagar district-ah te bomb kam tur hian an tir bawk nia sawi a ni. August 11-a Philobari bypass road-a bomb puakah khan an inhnamhnawih ve em tih erawh hriat a la ni lo.

August 15-a I-Day lawm a nih khan Tinsukia leh Charaido district hmun hrang hrangah bomb vawi nga a puak a, thi leh hliam an awm hriat a ni lo. Tinsukia district-ah hian Laipuli area-a Indira Gandhi School bulah bomb a puak a, he mi hnu hian Budlabeta leh Masuwa-ah te a puak zui bawk. August 12 zana ULFA-I ten mi pahnih an kah hlumna hmun Bahbon-ah a puak leh bawk a ni.

State home department leh Assam State Commission for Protection of Child Rights te chuan thuchhuah siamin, ULFA-I ten naupang hi cheng 500 pek an tum niin an sawi a, mahse naupangte hian an lak duh loh mai bakah Assam chu pawn lam aṭanga rawn beihna lak aṭanga chanhimna tur zawk niin an ngai tih an sawi. Child Rights Commission chairperson Runumi Gogoi chuan heng naupang pahnih te hi Jorhat-a observation home-ah counselling pek nghal an nih thu leh, heng zirlaite hian petrol thunna tura ULFA-I ten cheng 500 an pek chu an lak duh loh thu an sawi. ULFA-I te chu Assam tana venhimhna thawktu niin an ngai a, bomb chu mihring tamna hmunah pawh kam loin, mi tlemnah an kam zawk a ni, tiin Gogoi chuan a sawi.

Bomb kam tura tirtu ULFA-I te hian AK series rifle an keng nia hriat a ni a, heng naupang pahnih te hi bomb kam tur hian an thlem a, sum emaw thil dang pek an ni lo nia tarlan a ni.