JCILPS hruaitu hlun Ratan man

Manipur-a Joint Committee on Inner Line Permit Systems (JCILPS) hruaitu hlun Khomdram Ratan chu Nilaini khan Keishampat Leima-jam Leikai community hall, Imphal-ah man a ni a, JCILPS ten an thil phut tihhlawhtling tura sorkar nawr nana ni 15 chhung chaw nghei an kalpui chu a zawm ve nia hriat a ni.

Ratan chuan chaw nghei kalpui a zawm chhan sawiin, Manipur-a hnam hrang hrangte dikna leh chanvo humhalh a nih zel theih nana ti a nih thu a sawi. JCILPS activist, zirlai leh thuthar thehdarhtute chuan Ratana man a nih thu an hriat veleh hian Leikai community hall hi an pan ve nghal a ni. Ratan chuan tun hnaiah sorkar leh JCILPS te chuan thawhhona ṭha an nei lo tih sawiin, sorkar chu kawng diklo zawhah a puh.

State sorkar chuan June 2 khan Khomdram Ratan hi sorkar mi zawn mek a nih thu a tarlang a, Facebook-ah ‘wanted’ tiin a thlalak pawh tihdarh a ni. Ratan-a lakah hian thubuai ṭhahnem tak ziah luh a ni a, JCILPS huaihawta lungawilohna lantirah a phusa ber pawl niin, mipuite tharum thawh tura fuihpawrh leh tharum thawhna thleng eng emaw zatah inhnamhnawihah puh a ni.