Sikkim leimin-ah chhanchhuah hna thawk mek zel

August 19-a North Sikkim, Dzongu-a leimin nasa tak avanga har-satna tawkte chhanchhuah hna chu thawh chhunzawm zel a ni.

Indian Air Force choppers te chuan Mangan Helipad-ah Lingdem, Sakyong leh Pentonk khua te tan buhfai, oil, leh nitin mamawh an thlak sak.

August 13 khan Sikkim-ah hian nasa takin lei a min a, Rongyoung lui leh a fintu luite a hnawh a avangin lui luang chu a inkhuap a, a bul hnai ram zau tak a chim tawh nia tarlan a ni. Thawhlehni khan hemi chungchang ngaihtuah hian Deputy Speaker, MLA leh district thuneitute chuan meeeting an nei. Tingvong leh Lingdem khuaah te bungrua ṭhahnem tak thawn luh a ni tawh a, Medical Doctor tirh an ni tawh bawk. Chhanchhuah hna thawktute chu a remchan dan angin ṭanpui hna hi an thawk a, army doctor te chuan Upper Dzongu-a Tingvong PHSC-ah August 19 khan medical camp an buatsaih bawk.

Leiminin Rongyoung a hnawh avanga tuikhuah insiam zau zawng hi metre 45 vel zet a ni tawh a, lui mawng lam chu a kangchat tawh nia tarlan a ni.

Tui hian Mentam-ah chuan in panga a chim tawh a, motor kawngpui metre 300 vel zeta thui chu a chim tawh bawk. Mentam khaw mipuite chu hmun him lamah sawn chhuah an ni a, relief camp-ah an khawsa lailawk a ni. Rongyoung lui ring hian tuikhuah leh hydropower project eng emaw zat siam a nih avangin, khaw eng emaw zat chuan current an nei tawh lo.

Helai hmunah hian ruah a sur ngai meuh loh avangin an harsatna tawh hian power supply pek chhuah kawngah harsatna nasa zawk a thlen theih thu tarlan a ni. National Disaster Response Force te pawhin Sikkim hi an pan tawh bawk.