Assam-ah cancer enna khawl thar hawng

Assam Chief Minister Sarbananda Sonowal chuan Zirtawpni khan can-cer enna khawl, Positron Emission Tomography-Computed Tomography (PET-CT) scanner system leh cyclotron machine chu Guwahati Medical College and Hospital-ah a hawng.

PET-CT scanner hi nuclear medicine imaging device ang niin, cyclotron hi radioactive isotope making machine a ni thung. He khawl hmang hian doctor-te chuan awlsam zawkin damlo taksaa cancer cell awm te chu an hmuchhuak thei tawh dawn a ni. GMCH-ah PET-CT scanner hlawh-tling taka bun a ni thei ta chu lawmawm an tih thu Health minister Himanta Biswa Sarma, doctor leh official te chuan an sawi. CM Sonowal chuan, "Sorkar-in health leh education sector a ngaih pawimawh thu kan sawi fo a, a hlawhtlinna kan hmu chho zel hi a lawmawm hle a ni", a ti bawk.

Hawnna hmanpuitu Health and Family Welfare minister Himanta Biswa Sarma pawhin, mihring taksaa cancer cell awlsam zawka hmuchhuah theih a ni dawn ta chuan cancer natna do kawngah nasa taka hmasawnna a thlen a beisei tih a sawi. Sarma chuan GMCH leh All India Institute of Medical Sciences (AIIMS) te chu India ram state zinga sorkar damdawi-ina PET-CT scanner leh cyclotron machine neikawp thei hmasa ber an nih thu a sawi. Sarma chuan kumin October ral hmain khum 200 awm theihna cancer hospital hawn a nih tur thu a sawi bawk.