Pasighat-ah Advance Landing Ground hawng

Union Minister of State for Home Kiren Rijiju chuan Zirtawpni khan Arunachal Pradesh-a Pasighat-ah Advance Landing Ground thar a hawng.

Kiren Rijiju chuan ALG hawn a ni leh ta chu lawmawm a tih thu sawiin, China sipaiten India an beihthut laka invenna tur a ni thu a sawi. July thla chhung khan China chuan a sipaite chu AP-ah hian ṭum hnih ngawt a tir lut a ni. A vawikhatna chu July 22 kha niin, China sipaite hi Anjaw district-a Kibithu area-ah an lut a, July thla chhung vek khan Tawang district-a Thangsa-ah an lut leh tih Pasighat Advance Landing Ground hawnna inkhawmah Minister chuan a sawi. Rijiju chuan India leh a
ṭhenawm ram China chuan hun rei tak ata tawh Line of Actual Control-ah buaina an nei tih sawin, thil chin fel harsa tak a ni, a ti bawk.

China sorkar chuan India nen a inrinnaah nasa takin infrastructure development lamah hma a la a, hei hi hriain sorkar laipui pawhin ramri depa awm hmarchhak hmun hrang hrangah venhimna tichak zual turin infrastructure lamah hma la a zui ve a ni. Pasighat-a Advance Landing Ground din hi a hmalakna pakhat niin, AP-ah hian ALG dang pali a lo din sa tawh bawk. Minister chuan ram leh mipuite himna chu sorkarin a ngaih pawimawh ber a ni a ti a, ramri hnaia ALG din a nih avang hian India chuan ram dang a cho tihna a ni lo a, ram him nana din a nih zawk thu a sawi.

Union Minister Kiren Rijiju chuan sorkar laipui chuan Tawang-ah ALG hi din belh leh a tum mek niin a sawi. Hei bakah hian Pasighat-a Advance Landing Ground-ah hian civilian terminal din turin hma lak a ni, a ti a, Airport Authority of India leh Union Civil Aviation Ministry te hriattir an ni tawh tih a sawi. Arunachal Pradesh ṭhenawm, Assam chungchang pawh minister chuan sawi chhuakin, dan leh thupek khauh zawka kenkawh a ngai a ni, a ti. United Liberation Front of Assam (ULFA) leh National Democratic Front of Bodoland (NDFB) te chetna tihtawp a nih theih nan Assam Chief Minister Sarbananda Sonowal chu sorkar laipuiah rawtna thlen turin a ti bawk.