House aṭangin Tripura CPI(M) MLA-te chhuak tau

Tripura Assembly session, Thawhṭanni-a neihah CPI(M) MLA-te chu question-answer session neih loh a nih chungchangah sorkar chuan eptute aw chhuah tur dan beh a tum nia sawiin, House aṭangin an chhuak tau. 

Ni khat awh monsoon session hi Thawhṭanni khan neih a ni a, sawihona nei loin bill 10 pass a ni leh a, heng zingah hian labour law pawh a tel. Member thite sunna hun leh  Business Advisory Committee report pharh a nih hnuah, CPI(MLA) Tapan Chakraborty chuan question-answer session telh a nih loh chhan a zawt a, mahse thu a sawi ṭan chauh tihin a microphone hi off sak a ni. 

Opposition leader Manik Sarka pawhin zawhna ngai bawk hi zawtin, a ni pawhi minute khat thu a sawi tlin hmain a microphone off sak a ni zui ve leh bawk. Hemi hnu hian CPI (M) MLA 16-te chuan lungawi lohna thu sawiin an au zui a, Assembly-ah rualkhat taka rorelsak an phut thu sawiin, a hnuah hian lungawi loin House aṭangin an chhuak zui. 

Sarkar chuan House pawn lam­ah chanchinthar lakhawmtute a kawmnaah, House-a rorelnaah chuan tel a, an ngaihdan leh duh­dante sawi ve an duh a, mahse thu sawi ve an phalsak loh avangin an chhuak ta tih a sawi. CM hlui Sarkar chuan an party chuan Covid-19  lenga vanga state mipuite harsatna chi hrang hrang an tawhte pawh sawiho an duh tih tarlangin, mahse BJP sorkar chuan aw an chhuah ve a phalsak lo a ni, a ti.