New Delhi-ah Manipur Chief Minister a zin

Manipur chief minister N Biren Singh chu an state-a by-election neih tur chungchangah central lama party hotute thu pawimawh sawipui turin New Delhi-ah a zin a, state unit BJP chief S Tikendra'n a zui. 

CM leh state BJP president hian by-election neih turah hian tun hnaia Congress MLA aṭanga bang a, an party zawm tharte chu BJP ticket-a din tir an nih theihna atan party hotute hi an sawipui dawn nia sawi a ni. Hei bakah council of minister siksawi chungchang pawh sawipui an tum bawk. 

By-election hi constituency pangaah neih a ngai dawn a, Election Commission of India chuan inthlan neih hun tur hi la tichiang lo mah se, kumin November thlaa Bihar assembly neih rualin ram chhung hmun hrang hranga by-election neih ngaihna  hmunah inthlan hi buatsaih ve nghal a tum nia sawi a ni. 

State chhunga party hrang hrangte chu by-election neih tur atan hian an campaign ṭan tawh a ni. Kar liam ta khan CM Singh chuan Thoubal district-a Wangjing-Tentha assembly constituency-ah party election campaign hi a hawng a, NPP pawhin an party national president Conrad Sangma-a'n kar hmasaa an state a tlawh ṭumin campaign hi an lo hawng tawh bawk.