Manipur : Anti-extortion cell hawng

Manipur sorkar chuan Pathianni, January 26 khan state chhunga dan leh thupek kenkawhna kawnga pui turin Home Department hnuaiah Anti-Extortion Cell a hawng. He cell hawn tharah hian State Police, Central Armed Police Force (CAPF) leh Assam Rifle/Army aiawh te an tel.

State mipuite chuan toll-free number, 1800 202 3326 hmangin an be pawp thei dawn a ni. He cell hian mipui, sorkar hnathawk, contractor leh official-te chunga vauna leh sum pe tura phutna thleng ṭhin tih tawp nan hma an la dawn a ni.

Manipur chief secretary Prashant Kumar Singh chuan thuchhuah siamin, he hmalakna hian dan phal loha pawisa khawn ṭhin leh a kaihhnawiha inhnamhnawih te chunga hremna pek kawngah hna an thawk dawn a, mipui vantlang himna atan venhimna an pe dawn a ni, a ti.

Chief Secretary chuan mimal, sorkar hnathawk te pawh tiamin, call, message leh lehkhathawn hmanga vau na tawk an awm ṭhin a, hetiang thil ti ṭhin te hi state chhung dan leh thupek zah lohna a nih thu a sawi. Singh hi 1993-batch, Indian Administrative Service (IAS) niin January 15 khan chief secretary hna hi a chelh ṭan a ni.

Report an dawn hnuah cell chuan police station hnaivai te an hriattir dawn a, hma la zuiin pawikhawihtute hremna an pe ṭhin dawn a ni. Hei bakah hian mipui vantlang chu hmun him lo tlawh lo turin an chah bawk.

Manipur sorkar chuan pawikhawihnaa inhnamhnawih ṭhin te leh sum pe tura phut na siam ṭhinte do letna kawngah mipuite chu thawhpui turin a sawm.