Meghalaya-ah Lockdown puang dawn lo

Meghalaya chief minister Conrad Sangma chuan state chhungah Covid-19 kai pung zel mah se, a kaih­hruai sorkar chuan hri leng vangin lock­down puan a tum tawh rih lo tih a sawi. 

Thawhṭannia review meeting neihnaah, CM chuan lockdown puan chu state economy kharna a ni tel tih a sawi a, "Lockdown hi kan harsatna chinfelna a ni lo a, coronavirus darh chak tur tihkhawtlaina chauh a ni," a ti. State sum leh pai dinhmun a ṭhat loh avangin lockdown puang thei an ni tawh rih lo tih a sawi bawk. 

Meghalaya CM chuan Covid-19 hri chu a bo mai dawn loa, hei vang hian mipuite pawhin fimkhur taka hri leng kara nun dan an inzir chhoh a ngai a ni, a ti. Review meeting neih hma hian social media lamah Shillong-ah lockdown puan a ni leh dawn tiin thu dik lo thehdarh a ni a, hei vang hian Director of Information and Public Relations chuan cyber crime police station-a officer-in-charge hnenah FIR a thehlut nghal a ni. Thu dik lo thehdarhtute man chhuah a, dan anga hrem an ni dawn tih an sawi. 

Doordarshan Kendra, Shillong-a Assistant Director (News) pawhin DD News Shillong logo hmanga thu dik lo thehdarh a nih avangin Madantring police station-ah FIR a thehlut bawk. Meghalaya-ah hian Covid-19 kai hmuh chhuah mi 4,733 an awm tawh. Hri kai zinga 37 in an thihpui tawh a, enkawl dam 2,527 an awm tawh a ni.