M'laya sorkarin in chhawng sang enfiah dawn

Meghalaya sorkar chuan Shillong 'sensitive security area' huam chhunga in chhawng sang dingte chu enfiah a tum.

Chief Minister Mukul Sang­ma kaihhruaina hnuaia cabinet meeting neihah he thu thutlukna hi siam a ni a, zone hrang hranga awmte chu enfiah a nih hnuah in chhawng sang sak danah Me­ghalaya Town and Country Planning Act, tlawhchhanin khuah­khirhna siam an tum thu a tarlang.

Meghalaya Urban Affairs department official chuan Shil­long-a high court, state secretariat, jail, police head­quarters, Raj Bhavan, Assem­bly, VIP bunga­low leh military station te chu "sensitive security areas" tia ngaih­ah an awm thu a sawi a, security chu he lai hmun thlan chhan a nih thu leh a himna tiderthawng thei in chhawng sang lutuk sak chu a him lo a ni, a ti.

Lirnghing natna bial chhung (highly seismic zone) a building sang lutuk chu Meghalaya High Court thupekin Meghalaya Urban Development Authority (MUDA) chuan tun hnai khan an lo kharsak tawh a ni.

Meghalaya cabinet mee­ting hian kar kalta khan Meghalaya Building Bylaws, 2011 amend tura rawtna a lo pawm tawh bawk. He dan siamṭha tura rawt­naah hian ground level aṭanga building san zawn khuahkhirhna a tel a, building san zawng chu basement tel loin floor 4 (metre 14) thleng leh basement telin floor nga (metre 17) thleng sak phal a ni.