Tripura-in elephant reserve 2 hawn tum

Tripura chuan sai humhalh kawnga hma thar lak tumin elephant conservation reserve pahnih hawn a tum.

State sorkar chuan elephant reserve hi Dhalai district Athara­mura leh Gomati district Gandhari-ah hawn a tum a, Union Ministry of Forest and Environment-ah rawtna a thlen tawh bawk.

State forest department-in ruahmanna a siamah Gandhari hi square kilometre 123-a zau a ni a, Atharamura reserve hi sq. km 60-a zau a ni.

Forest Minister Naresh Ja­ma­tia chuan elephant reserve hawn­na atan Ministry of Forest and Environment rawtna leh ṭan­pui dilna an thlen tawh thu a sawi a, a puitling thei a nih chuan Gandhari leh Atharamura chhehvela chengte'n ei leh barah an hlawkpui theih a beisei thu a sawi.

Tripura Wildlife Warden Dr AK Gupta chuan project chungchang hi sawiin, elephant reserve chhunga chengte chuan reserve an chhuahsan a ngaih loh thu leh Tripura chuan mihring leh ramsa chen nan ram awl a neih ṭhat thu a sawi.

Ruahmanna ang chuan reserve chhungah hian thingphun beihpui thlak a ni a, hmun remchangah tui­khur siam a ni ang. Wildlife War­den Gupta chuan project pahnih atan cheng vaibelchhe 10 vel an mamawh thu a sawi.

Hetihlai hian Tripura-a sahuan leh Bengaluru-a sahuan chuan ramsa inthleng an tum.

Forests Minister Jamatia chuan Tripura-a Sepahijala Zoo leh Benglauru-a Ban­nerghatta Zoo and National Park chu ramsa inthleng tura remna an siampui thu a sawi.

"Inremna ang chuan Ban­ner­ghatta zoo and National Park chuan Sepahijala Zoo chu sakei­baknei pahnih, sazuk chi khat (black buck) pathum, sazuk (sambar) pahnih leh sakuh pahnih a pe ang a, Sepahijala zoo chuan ngau (langur) pathum, hauhuk chi khat (pig-tailed Macaque) pathum leh savawm pahnih a pelet ve thung ang," tiin Jamatia chuan a sawi.

Sahuan pahnihte chuan Central Zoo Authority aṭang­in phalna neih ngaite an tihfel tawh thu Tripura Forest Minister chuan a sawi bawk a, nikum khan Sepahijala Zoo leh Visa­khapatnam-a Indira Gandhi Zoological Park chuan ramsa an inthleng tawh thu a sawi bawk.