Manipur: Congress-in NPP MLA 4 ban turin phût

29th January, 2025

Manipur-a eptu pawl, Congress party chuan Thawhṭanni khan National People's Party (NPP) MLA pali te chu BJP kaihhruai sorkar an thlawp avangin MLA an nihna aṭanga ban an phût. NPP hian nikum November thla khan BJP an thlawpna an lo hnukdawk tawh a, heti chung hian an MLA pali hian BJP sorkar hi an la thlawp zui tho a ni.

Manipur Congress vice-president Hareshwar Goswami chuan Assembly-a Speaker Tribunal-ah NPP MLA palite ban phutna petition hi a hran ṭheuhin a thehlut a ni.

Goswani ukil, N. Bupenda Meitei chuan NPP MLA ten BJP kaihhruai sorkar an thlawp chhunzawm zel avanga petition hi theh lut an nih thu sawiin, "Heng MLA palite hi nikum November thlaah chief minister N Biren Singh-a'n rorellai MLA meeting a kohah khan an tel a ni. Hetih lai hian NPP national president, Conrad K Sangma chuan an party-in BJP kaihhruai sorkar an thlawpna an hnuhdawh thu hi a lo sawi tawh thung," a ti.

Meghachandra case pawh sawilangin, Supreme Court chuan ban tura phutna petition chu chu thla thum chhunga chinfel turin a lo ti tawh a, hetiang bawk hian Speaker pawhin an thil phut chungchangah rang taka a rel fel thuai an beisei thu Meitei chuan a sawi bawk.

MLA an nihna aṭanga ban tura phut, petition-a tarlante hi Mayanglambam Rameshwar Singh, Thongam Shanti Singh, Irengbam Nalini Devi leh Janghemlung Panmei te an ni.

NPP hi Meghalaya chief minister Conrad K. Sangma kaihhruai a ni a, Manipur-a BJP kaihhruai sorkar an thlawpna chu kum kalta November 17, 2024 khan an lo hnukdawk tawh a ni. Manipur chief minister N. Biren Singh chu tualchhunga buaina chhuak chingfel thei loah puhin, a kaihhruai sorkar an thawhpuina chu an ti tawp.

Member 60 awmna, Manipur Assembly-ah NPP hian MLA pasarih an nei. January 18 khan an zinga pakhat, Manipur NPP unit president N.Kayisii a thih tak avangin MLA hi paruk an nei ta a ni. NPP-in an thlawpna ti tawp mah se Manipur-a BJP kaihhruai sorkar a ti nghing pha lo. BJP hian MLA 37 neiin, Naga People's Front (NPF) panga leh independent MLA pathumin an thlawp a ni.

May 3, 2023-a Manipur-a buaina a chhuah aṭangin tribal MLA 10-te chuan Assembly session an la boycott chhunzawm zel. An zingah hian BJP MLA pasarih leh Kuki People's Alliance MLA pahnih an tel. Tribal MLA 10 zingh hian minister pahnih - Letpao Haokip leh Nemcha Kipgen an awm bawk.