Assam: UGC dan thar siam hnukdawk turin phut

Assam Lok Sabha MP, Pradyut Bordoloi chuan union education minister Dharmendra Pradhan hnenah UGC Regulation, 2025 chu hnukdawk turin a ngen.

He dan thar siam, Minimum Qualifications for Appointment & Promotion of Teachers and Academic Staff in Universities and Colleges and Measures for the Maintenance of Standards in Higher Education, tih chu January 6 khan tlangzarh a ni. Bordoloi chuan he rawtna siam hian India ram rorelna a ti bawrhbang a, state sorkar rorelna dipdalna a ni, a ti.

Dan thar siama Rule 10 chuan vice-chancellor (VC) thlan nana Chancellor hnena thuneihna zawng zawng an pe chu MP hian a hrethiam lo a, Vice-chancellor thlanna tura state sorkar an telh ve lo chu state sorkar rorelna kalh leh, zirna sang zawka state sorkar rorelna pawisak lohna a nih thu a tarlang bawk.

Vice-chancellor nih theih nana criteria huang zauh zinga public policy, industry leh private sector-a tawnhriat nei an telh chu awmze nei lo, politics lama induhsakna avanga thlan tlin theih a nihna lai a awm bakah, India university inkaihhruai dan a ti bawrhbang dawn a ni tiin a sawi.

Rule 11-ah dan thar siam hmang lo te chu UGC grant pek loh bakah degree program siamsak loh telh niin, hei hi University Grant Commission Act, 1956 kalh a nih thu Bordoloi chuan a sawi bawk. MP chuan heng dan thar an siam te hi hnukdawk leh turin leh state sorkar be rawna an thuneihna zah sak turin a ngen.