Arunachal: Loneituten an thlai thar ITBP hlan

Arunachal Pradesh-a tualchhung loneitute leh self-help group (SHG) chuan an thei leh thlai thar hmasa ber chu Indo-Tibetan Border Police (ITBP) hnenah Thawhṭanni khan an hlan.

Heng thlai thar an hlan hi ITBP leh Arunachal Pradesh Agriculture Marketing Board ten memorandum of understanding (MoU) an ziah tih hlawhtlinna a ni.

MoU in a tum ber chu tualchhung loneitute leh SHG hnuaia hnathawk te tan sumdawnna siamsak leh an nitin nun hmasawnna tur ruahman sak a ni.

He hmalakna tihlawhtling tur hian Arunachal State Rural Livelihood Mission (ArSRLM) Block Mission Management unit, Tuting leh agriculture department ṭangkawp chuan theihtawp an chhuah a ni. ArSRLM hian thingtlang khaw mite chu SHG ah hian ziak lutin agriculture lama eizawnna an neih theih nan an mamawh ang te an pe ṭhin.