Manipur: ILP system hman kum 5-na lawm

Manipur chuan an state-a Inner Line Permit (ILP) system hman a nih kum nga-na chu January 28 khan Imphal-a Secretariat-ah an lawm.

Secretariat-a hun hman hi chief minister N Biren Singh chuan hman puiin, ILP hman a nih theihna atana nasa taka hma lo la tu, sorkar official-te chu lawmthu a hrilh. Home Department, Imphal West Police, leh Deputy Commissioner office official-te hnenah an hnathawh ṭhat avangin chawimawina, certificate a hlan bawk.

ILP hi state sorkarin a pek chhuah niin, state venhimna atana tih a ni. Manipur state mi ni lo, pawn lam ni India khua leh tuite chuan Manipur tlawh tur hian state sorkar aṭangin ILP hi an lak a ngai a ni. Hei hi state leh a leilung fate leh an hnamziate humhalh a, chimral an nih laka venna tura ruahman a ni. Manipur hi hmarchhak state zingah ILP hmanna palina niin, an hma hian Arunachal Pradesh, Nagaland leh Mizoram chuan an lo hmang tawh a ni.

Manipur-a ILP hman ve phutin kum tam tak sorkar laipui an nawr a, kum 2019, December 11 khan hman ṭan a ni ta a ni. CM Singh chuan ILP system an hmang ve thei ta chu an state tana mellung pawimawh tak a nih thu sawiin, leilung fate venhim kawngah nasa taka a puih thu a sawi bawk.

Kum 2024 chhung khan Manipur hian ILP a pek chhuahna aṭangin Rs 61,33,400 a la lut a ni. Official report tih chhuahah, January 1 - Decembre 31, 2024 chhung khan state hmarlam, Nagaland nena an inrina bula Moa Gate aṭangin mi 51,774 in ILP hi an la. Hetih lai hian ILP nei loa lout hi mi 946 man an ni bawk. Jiribam-a ILP counter aṭanga permit pek chhuah zat report kimchang erawh hriat a la ni lo thung.