Nagaland : Deputy CM-in NHIDCL project ennawn

Nagaland deputy chief minister T.R Zeliang chuan NHIDCL official, district aiawh leh contractor te nen meeting neiin, Nagaland-a national highway project hna thawhte an ennawn.

Meeting-ah hian road project 19 chungchang an sawiho a, heng zinga 15 te hian ram chungchangah buaina an la nei mek a ni

Deputy CM Zeliang chuan district hruaitute chu ram chungchanga buaina awm chu February chhunga ti fel tur leh, GB leh Village Council Chairperson te thlawpna pawh a ṭul chuan dil turin a chah bawk.

Dimapur-Kohima 4-lane kawnga slope protection siam pawh sawi langin, contractor te hian Right of Way (RoW) record, 2013-14 an neihloh thu an sawi. Deputy CM chuan NHIDCL chu NHAI nen ṭangkawpin document pawimawh buatsaih turin a ti a ni.

Ram neitu, compensation dawng tawhte hnathawh ti bahlah zawnga an chet ṭhin chungchangah, district official-te chu insawnchhuak tura hriattirna ti chhuak tur leh, a ṭul chuan an in pawh chu ṭhiahsak turin Zeliang chuan a hrilh bawk. Kawngpui ṭha siam tur chu mimal duhdan ringawt ni loin, mipui ten an chhawr leh hlawkpuina tur chu dah pawimawh zawk turin a ti.