Nagaland-in sorkar hna thawk mamawh aia tam nei

School Education & SCERT Minister Yitachu chuan Naga­land-in sorkar hnathawk mamawh aia tam, 70,000 chuang a neih thu a sawi.

Nagaland University Kohi­ma Campus-a Post Graduate Students’ Union-in parting so­cial a buatsaihah he thu hi sawiin, mi 70,000 sorkar hnathawk chuangtlaite hian kum khatah sorkar sumbawm aṭangin vai­belchhe 200 chuang an eiral ṭhin thu a sawi bawk.

"Sorkarin mitin hna a pe ang a, mi zawng zawngin thla hlawh an nei tur a ni, tia ngaihdan kan neih chu thil dik lo a ni," a ti.

Yitachu chuan post siam loa appointment pek chu dan bawhchhiatna, ‘economic crime' a ni, a ti a, economy eichhe thei thil a nih thu sawiin, he thil avanga harsatna thlengte chu do let turin ṭhalaite a sawm nghal.

"Kawng dik kan inkawhhmuh a pawimawh tak zet a, hmun ṭhenkhatah chuan kilometre khat-a thui kawngpui siamnaah work-charge labour 80 chuangte an awm ṭhin a ni," a ti.

Education Minister chuan Nagaland-in tui leh ramngaw kaihhnawih thilah policy rintlak tak a mamawh thu a sawi bawk a, ramngaw a chereu nasat avang­a tui hna harsatnain zual lam a pan zel thu leh mitinin he thil hi an ngaihpawimawh a ṭul thu a sawi.