Kawngpui dangtute'n truck an hal

State sorkarin an thil phut a tihpuitlin theih loh avanga lungawi loh­na lantirin All Tribal Students’ Union Manipur (ATSUM) chuan June 22 zan aṭangin Manipur-a National Highway pa­thum an dangchat.

ATSUM thlawptu nia rinte chuan Thawhlehni khan Senapati district, Sapermeina hmunah truck pakhat an hal a, Tamenglong district Noney hmuna Imphal-Ji­ri­bam kawngpuiah bung­raw phur truck pakhat an vuakchhiat bakah Thamnapokpi-a Imphal-Moreh kawngpuiah truck pakhat an bei bawk.

Zirlai pawl hian sor­kar laka an thil phut nawr nan NH-2 (Imphal-Mao), NH-37 (Imphal-Jiribam) leh NH-150 (Imphal-Churachandpur) te an dangchat a, sorkarin an thil phut a tihhlawhtlin hma chuan dan chhun­zawm zel an tum thu an tarlang.

ATSUM chuan Ma­ni­pur tlangram biala contract lecturer 286 leh Adhoc tea­cher 333 te tihngheh an phut bakah Schedule Tribe Commission din, Im­phal-a Jawaharlal Nehru Institute of Medical Sciences Hospital-a ST seat leh state Legislative Assembly Secretariat-a ST seat hnawhkhah te an phut a ni.

Hetihlai hian Meitei Youth Front South East Asia (MYF) chuan ATSUM-in an thil phut nawr nana kawngpui a dangchat ṭhin chu ninawm a tih thu a tarlang.

MYF chuan ATSUM thil phut, tlangram dis­trict te hnena Land Re­cords transfer ngenna chu ṭha tih loh thu a tarlang bawk a, tribal te chhenna tlangram district zawng zawng chu administration pakhat hnuaiah dah theih a ni lo, a ti.