Tripura-in Modi hmaah a hlawhtlinna tarlang dawn

Tripura sorkar chuan Agartala khawpui cheimawina atana pro­ject a kalpui, Light Emitting Diode (LED) illumination pro­ject-a a hlawhtlinna chu Prime Minister Narendra Modi hmaah a tarlang dawn.

Tripura Urban Development Minister Manik Dey chuan he thu hi sawiin, Union Ministry of Urban Development-in June 26 hian state tina Urban Development Minister te meeting a koh thu leh Smart city project chungchanga ni khat awh, workshop neih turin a chhunzawm nghal tur thu a sawi.

Tripura Minister Dey chuan state Urban Development secre­tary Lok Ranjan-a'n Agartala LED illumination project hlawh­tlinna a tarlan tur thu a sawi a, United Progressive Alliance (UPA) sorkarin Jawaharlal Nehru National Urban Renewal Mission (JnNURM) a lo kalpui tawh chu NDA sorkara Ministry of Urban Development-in AMRUT (Atal Mission for Rejuvenation and Urban Transformation)-a a thlak thu leh AMRUT hnuaiah hian khawpuia chengte tan Prime Minister Modi chuan Smart Cities Mission leh Housing for All scheme te pawh kalpui a tum thu a sawi.

Dey chuan LED project hlawh­­­­tlinna chu sorkar laipui pawh­in fak­awm a ti tih sawiin, Agar­tala khawpui eng hmanga cheimawinaah 85% chu LED a nih tawh thu a sawi bawk.

Agartala LED illumination project-ah hian cheng vaibelchhe 18 sen a ni a, Union Ministry hnuai­­­a Energy Efficiency Services Ltd (EESL)-in hna a thawk.

LED hmanga khawpui chei­mawi chuan eng chhit man a tihtlem bakah khawpui hmel a tidanglam a ni, tiin Dey chuan a sawi bawk.

Agartala hi India ram khaw­puiah LED hmanga cheimawi pathumna a ni a, a hmain EESL chuan Hyderabad leh Vijayawada khawpui chu LED hmangin a lo cheimawisak tawh bawk.