NE-a Congress paihthlak nan Home Ministry hmang: AICC

All India Congress Committee (AICC) chuan Prime Minister Narendra Modi kaih­hruai, BJP sorkar chu Union Minister of State for Home Affairs Kiren Rijiju hmanruaa hmanga hmarchhak biala Congress rorelna state-te tihbuai tumah a puh.

AICC chuan hmar­chhak biala BJP sorkar hmalak dan chu an party president, Amit Shah-a'n an enpui reng a ni, tiin a tarlang bawk.

AICC General Secre­tary V Narainsamy chuan, "Helpawlte'n Congress MLA te chu an party chhuahsana BJP zawm turin an vau a, a rapthlak hle. He thilah hian Union Home Ministry pawh a inrawlh a, Union Minister Rijiju pawh thuk takin a inrawlh a ni," a ti.

Prime Minister Modi chuan nunphung dik pawimawhna leh state-central sorkar thawh­ho­na ṭha uar takin a sawi ṭhin a, hetihlai hian BJP president Shah chuan hmarchhak biala Congress MLA te chu a tibuai reng a ni, tiin Na­rain­­samy chuan a sawi bawk.

Congress party hian India ram state pakhuaah sorkar a siam mek a, heng zinga state panga - Assam, Arunachal Pra­­desh, Mizoram, Mani­pur leh Meghalaya hi hmarchhak state an ni.

AICC General Secre­tary chuan Rashtriya Swayamsevak Sangh (RSS)-a lo inhmang tawh, hmarchhak state Governor te chu NDA sorkarin Congress sorkarna state tihbuaina hmaruaah a hmang ṭhin tih a sawi bawk a, "Home Ministry an ni emaw DoNER Ministry emaw pawh ni se, a hnung lam aṭanga Congress sorkar paihthlak tumin an thawkho vek a ni," a ti.

Narainsamy chuan Arunachal Pradesh-a Congress MLA te party chhuahsan tura vau nan hel hmangah NDA sorkar chu a puh bawk a, "He thil hi NSCN (K) helte zawt ula an lo hrihlh chiang ang che u," tiin a sawi.

Congress hotu chuan, helpawlte'n sorkar an tihbuai dan chungchang zawhna chhangin helte chuan Manipur sorkar chu an tihbuai reng thu leh Nagaland-a MLA te pawh an tihbuai ṭhin thu a sawi.

"Modi sorkar thil tum tenawm tak chu Parliament chhung leh pawnah theih­tawp chhuahin kan bei zel ang," a ti.