Assam : Detention camp-a thi zat 29 tling tawh

Assam-a ramdang mi, 'foreigner' tia puan pakhat chu detention camp-a dah a nih hnuah a dam loh avangin Gauhati Medical College and Hospital (GMCH), Guwhati-a enkawl a ni a, kar liam ta Zirtawpni khan a thi. Ani nen hian detention camp-a awm thi zat hi mi 29 an tling tawh. 

Official lamin an tarlan danin, Zirtawpni zana thi hi Naresh Koch a ni a, Goalpara detention camp-a awm niin, ni 10 liam taah khan GMCH-ah dah luh a ni. Naresh Koch hi kum 50 bawr vel niin, Goalpara district-a Mornoi-a cheng a ni. Mahse foreigners' tribunal chuan 'foreigner' tia a puan a vangin kum 2018, March thla khan detention camp-ah hian dah a ni. 

Assam-a detention camp-ah hian mi 1100 chuang an awm mek. Nikum August 31-a National Register of Citizens (NRC) final list tihchhuah a nih hma khan, BJP kaihhruai state sorkar chuan 'foreigner' tia puan mi 20 vel chu detention camp-ah kum thum an lo awm tawh avangin a lo chhuah zalen tawh a ni. Detention camp-ah kum thum awm tling tawh, 'foreigner' tia pun mi 335 an la awm mek. 

Assam state-ah hian detention centre paruk a awm a, hengte hi district jail-ah cell hran siam an ni. A pasarihna tur hi Goalpara-ah siam mek a ni a, hetah hian 'foreigner' tia puante chauh dah an ni ang. Heng centre-a dahte hi pawikhawihtu, misualte an enkawl dan anga enkawl an ni ṭhin.