NRC dik leh rintlak ram venhim nan a ṭangkai: Governor Acharya
Assam Governor PB Acharya chuan National Register of Citizens (NRC) dik leh rin tlak chu ram venhimna atana a ṭangkai thu a sawi.
NRC dik bakah rampawn mi tel lohna electoral roll dik neih a pawimawh thu a sawi bawk.
Governor Acharya chuan kum 2014-a Assam electoral roll buatsaih chu NRC buatsaihna atana innghahna tlak a nih loh thu sawiin, voter list-ah chuan Assam mite pawhin rampawn mi an tel thu vawi eng emaw zat an sawi tawh a, hei vang hian khua leh tui dik tak zawnchhuahnaa innghahna atan chuan a rintlak loh a ti.
Assam Governor chuan 2014 state electoral roll pawh ennawn ṭul a tih thu sawiin, khua leh tui dik nilote chu ram democracy kalphungah teltir theih an ni lo, a ti a, NRC update buaipuitu officer te chu rampawn mi an tel loh nan an fimkhur a pawimawh thu a sawi bawk.
Governor chuan India khua leh tui dik tak, kum 1971 hnua Assam lutte pawh NRC-ah telh tur an ni tih sawiin, NRC update kalpui mek chu Chief Minister Tarun Gogoi sawipui a tum thu a sawi.
Assam Congress party-in a thusawi an dodal chungchangah Governor Acharya chuan democracy hnuaiah tu pawhin zalen takin an thil duh lo zawng an dodal theih thu sawiin, Congress hruaitute chuan nawrh huaihawt kher loin amah an biak theih reng thu a sawi.
Assam Congress party-in amah an puhna lian ber chu Acharya chuan Dibrugarh University court member-a BJP leh RSS mi leh sa ruat a ni, a ti a, University Chancellor a nih angin court member atan hian mithiam leh social worker chauh a ruat thu a sawi.
"University chu hriatna hmunpui chauh ni loin hmasawnna hmunpui a ni tel tur a ni a, Dibrugarh University court member ruatnaah pawh he ngaihdan hi ka ngaipawimawh a ni. University Vice Chancellor pawhin court member ka ruat danah lawmthu min hrilh nghe nghe," tiin Acharya chuan a sawi.
Assam Governor Acharya hian tun hnaia Silchar-a public meeting-ah thu a sawi ṭumin, Congress party chu hmanlaia India ram awptu Mughal lal leh British mite aia India ram suam nasa zawk an ni, tiin a sawi.