Assam-in doctor te zirna senso dil let
Assam sorkar chuan post-graduate doctor zir zo tawh state sorkar hmaa an intiamna tipuitling lote chungah action lak a tum.
Chief Minister Tarun Gogoi chuan post-graduate doctor te chunga action la turin health and family welfare department a hriattir a ni. Assam medical college hrang hranga post-graduate zir zo tawh doctor 244 chuangte chuan an zir chhuah hunah a tlem berah kum 10 tal state sorkar hnuaia thawk turin thuthlung an ziak a, mahse hei hi an palzut avangin state sorkar chuan dan tlawhchhanin an zirna senso cheng nuai 20 ṭheuh a ṭhing let a ni.
Gogoi chuan hemi chungchang hi sawiin kum 2014-a post-graduate medical degree zirchhuakte chuan sorkar nena an thuthlung an palzut avangin an chungah dan anga action lak a nih tur thu a sawi a, Medical Council of India-ah thlen an tum thu a tarlang bawk.
Post-graduate doctor zir turte hian Assam medical college hrang hranga an zir dawnah an zirchhuah hunah kum 10 chhung Assam sorkar tan thawk tur leh an thawk thei lo a nih chuan state sorkarin an zirna senso a tumsak cheng nuai 20 pelet turin an intiam a ni, tiin Chief Minister office thuchhuak chuan a tarlang.
Assam Medical Colleges (Regulations of Admission into PG Course) Rules 2006 chuan post graduate doctor te chu an zir zawhah state sorkar hnuaiah a tlem berah kum 10 an thawk tur a ni, a ti a, he dan hi an zawm theih loh chuan state sorkarin an zirna senso a tumsak cheng nuai 20 chu zângnadawmna angin an rul let tur a ni, a ti.
"State sorkarin PG doctor te zir nan mipui sum tam tak seng mah se sorkar damdawi-in tlawhtu mipuite'n PG doctor te enkawlna an dawng thei ṭhin lo a ni. Hei vang hian sorkar chuan mipui sum a thlawnin luan raltir a tum lo," tiin Gogoi chuan a sawi.
Doctor te'n hetianga an thutiam leh mawhphurhna an ngaihthah ṭhin avangin, Gogoi chuan state medical college hrang hranga zir tur thlannaah health department official te chu thutiam khauh zawk siam turin a ngen bawk.