Meitei te'n ST status an phut

Manipur-a hnam lian ber, Meitei te chuan Sche­duled Tribe status phut­in Ningani khan Imphal-ah nawrh an huaihawt.

Scheduled Tribe De­mand Committee Ma­nipur (STDCM) kaih­hruaina hnuaiah nawrh hi huaihawt a ni a, Keishampat Lairem­bi community hall-a sit-in protest neih a nih hnuah Chief Minister chenna-in panin kawng an zawh nghal a, mahse police te'n an lo dang.

Police te chuan STDCM hotute erawh an kaltlangtir a, Chief Minister hnenah hian Meitei te schedule tribe-a telhna tur bill pass phutna, memorandum an thehlut nghal.

STDCM executive member Ningthoujam Nilachandra chuan an thil phut chungchangah state sorkarin kum thum chuang ngawih a chuh tawh avangin an thil phut chu ngawrh zawka nawr zel an tum thu a sawi.

STDCM chuan ST status phutin kum 2012 khan state leh central sorkarah ngenna kan lo thlen tawh a, kum 2013, May 29 khan Union Ministry of Tribal Affairs chuan Metei te socio-economic survey report thehlut turin state sorkar a hriattir a, mahse state sorkar chuan tun thlengin engmah a la bawhzui lo a ni, tiin Nilachandra chuan a sawi bawk.

STDCM executive member chuan Metei te chu ei leh barah an din­hmun ṭha lo mahse ST te'n ngaihhnathiamna an hmuh an ang an neih ve loh thu a sawi a, Manipur thingtlang lama Metei te chu nitin inhlawhfa chawpa eizawngte an nih thu a sawi bawk.

Kum 1891 census-ah Manipur-a Metei te chu 'forest tribe' anga chhin­chhiah an ni a ti a, kum 1901 census-ah pawh Metei te chu Manipur-a tri­bal hnam lian bera chhin­chhiah an ni, a ti.

Nilachandra chuan Assam-a hnam peng ruk te hnenah sorkar laipuiin ST status pek a tum thu sawiin, Assam hnam peng rukte hi ST status pek an nih chuan Meitei hnam chauh chu hmarchhak biala ST ni lo an nih tur thu a sawi bawk.