Manipur NPP-in Deputy CM hnawtchhuak

Manipur-a BJP kaihhruai ṭangrual sorkara tel, National People's Party (NPP) chhunga buaina kal zelah, deputy chief minister nilai Yumnam Joykumar Singh chu kum ruk chhung atan party member a nihna aṭangin hnawtchhuah a ni. 

Party thuchhuah chuan Deputy Chief Minister hi Disciplinary Committee rawtna angin, an party constitution hnuaiah kum ruk atan hnawhchhuah a nih thu a tarlang. 

Singh hi thla khat chhunga Manipur-a NPP hruaitu zingah hnawhchhuah pahnihna a ni. A hmain state president atana thlan nawn, Thangminlien Kipgen chu party danpui kalh zawnga thil a tih avangin NPP national president Conrad Sangma chuan a lo hnawt chhuak tawh bawk. 

BJP kaihhruai ṭangrual sorkarah hian NPP minister pali an awm. 

Thla hnih liam ta khan NPP MLA-te hian ṭangrual sorkar an thlawpna  hi an lo hnukdawk tawh a, mahse Conrad Sangma a inrawlh hnu leh, central lama BJP hruaitute nan an indawr hnuah sorkar thlawpna an hnuhdawk hi an sut leh a ni. NPP MLA-te an hel chungchangah hian kum 65 mi, Joykumar Singh hi a hmahruaitu ber nia sawi a ni.