NE tan special category status beisei

Central-a BJP kaihhruai NDA sorkarin hmarchhak state-te special category status tihtawp a tum chu titawp lo tura ngen a nih hnuin hman chhunzawm leh beisei a ni. Centrally Sponsored Schemes (CSS) pattern pawh a ngai kalpui leh beisei a ni bawk.

Special caterogy status tih­tawp tum hi kaltlang pui lo turin hmarchhak state chief minister-te chuan an ngen a, sorkar laipui aiawhte hnenah an thlen fo a ni.

Kar hmasaa Niti Aayog hnuaia chief minister sub-committee neihnaah special category status chungchang hi an sawiho a ni. Chief Ministers' sub-group hi Prime Minister siam niin, Madhya Pradesh Chief Minister Shivraj Singh Chouhan chu convener a ni a, member-ah hian Arunachal Pradesh, Jammu and Kashmir, Jharkhand, Kerala, Manipur, Nagaland, Rajasthan, Telangana, Uttar Pradesh chief minister-te bakah, Andaman and Nicobar Islands Lieutenant Governor an tel.

Committee draft report chuan Special Category states 11 te hnen­ah Core Sector Scheme-a sorkar laipui nena an intum sem dan chu 90:10 leh, optional scheme-ah 80:20 a nih tur thu a tarlang.

Draft report chuan CSS hnuaia project hrang hrang, hna thawk tur aṭanga 30% chin hna zawh tawh chu sorkar laipuiin sum a pek chhunzawm dawn tih sawi tawh. Heng project thawhna atana sum intum sem dan tur lo pawm tawh chu kum 2017, March thla thlengin hman chhunzawm a ni ang. He hun chhunga project-te hi zawh hman a nih loh chuan, a thawhna tur sum chu state-in a tum a ngai tawh dawn a ni.

Chief Ministers' sub group hian rawtna a siamte hi Prime Minister hnenah July 5 hian a thehluh ang.