NEMEA-in Hmarchhakah nawrh huaihawt dawn

Hmarchhak biala Mahatma Gandhi Na­tional Rural Employment Guarantee Act hnuaia thawk, mi 12,500-te chuan July 15 hian hmarchhak state hrang hrangah nawrh an huaihawt dawn.

North East MGNREGA Employees’ Association (NEMEA) general secretary Kukhil Baruah chuan hmarchhak bialah MGNREGA hna­thawkte harsatna hrang hrang pholanna atan nawrh hi huaihawt a nih tur thu a sawi.

Baruah chuan, 'MGNREGA hnathawkte hi state sorkar leh central sorkar chuan a ngaihsak tawk lo a, fahrah ang maia enkawl an ni' a ti.

Hnathawktute thil phut zingah hian an regular-a dah te, MGNREGA puala department hran siam leh, hnathawktute kalphung awmze nei tak siam te a tel. Hmarchhak state hrang hrangah MGNREGA hnathawkte hlawh, thla eng emaw zat hren sak an ni hlawm tih sawii, an hlawhte pechhuak turin an phut bawk.