Smart city project ka dil a, AMRUT scheme min pe : Gogoi

Assam Chief Minister Tarun Gogoi chuan central-a BJP kaihhruai sorkar laipui chu sawiselin, an state tana smart city project paruk a dil laiin town pasarih tan Atal Mission for Rejuvenation and Urban Transformation (AMRUT) scheme an pe tih a sawi.

CM Gogoi chuan, 'Sanga lian an dil laiin, sanga te ber che min pe a ni' a ti.

Assam-a BJP MP pasarih-te pawh sawiselin, Gogoi chuan Assam-in BJP tan Lok Sabha seat pasarih a pek laiin, MP-ten an state hmasawnna tura an party hruaitute an hmin thei lo chu mak a tih thu a sawi. Assam BJP MP zingah hian union minister of state for youth affairs and sportrs, Sarbananda Sonowal pawh a tel.

Gogoi chuan, 'Sarbananda Sonowal chuan smart city project sawichhuak loa puhin min sawisel fo a ni. Mahse an pute hnena smart city project paruk ka dil lai khan, MP te, a bikin BJP MP-te tan chu lo nawr zui a ni lawm ni? Nawr zui ze hmingṭhat an hlawh mai tur a ni. Kei min sawisel hian an hlawhchhamna an phawrh lang mai a ni' a ti.

Assam sorkar hian Prime Minister Narendra Modi-an smart city-a siam tur list a siam zingah an state-a khawpui paruk - Guwahati, Jorhat, Golaghat, Silchar, Tezpur leh Tinsukia-te telh turin a ngen. Mahse smart city list-ah hian Guwahati chauh hi telhin, khawpui te zawk (town) pasarih-te chu AMRUT scheme hnuaiah thlan an ni ta zawk a ni.

Assam CM hian NDA sorkar hnuaia union minister-ten Assam leh north east state dangte an tlawh fo chu sawichhuakin, minister-te tlawh ringawt ai hian hmarchhak bial chuan central aṭanga fund tam zawk dawn a mamawh zawk a ni, a ti.

Gogi chuan union minister-ten an tlawh fo chuan state-te chuan hlawkpuina an nei lo a, hetiang kalphung an siam hi India-in zalenna a neih hnua tihphung thar a ni, a ti. 'Mahse Assam chuan central minister-te rawn kal hi engmah hlawkpuina a nei lo. An hmuiin an sawi ringawt a,a taka inpuihna erawh a thleng zui chuang lo' a ti.