Manipur CM-in deficit budget a pharh

Manipur Chief Mi­nister O Ibobi Sing chuan kar kalta Zirtawpni khan state Assembly rorel in­khawmah kum 2015-16 chhung atana state deficit budget, cheng vaibelchhe 39 50.92 a pharh.

CM Ibobi Singh chuan sorkar laipuiin kum 2015-16 atana an state fund tur a la tihfel theih loh avangin full budget pharh theih a la ni lo tih a sawi. Hei bakah hian special caterogy status tihtawp sak an nih chuan sum lamah nasa taka harsatna an tawh theih tur thu a sawi bawk.

Sorkar laipuiin Cen­tral finance commission rawtna behchhana state tana non-plan fund a pek tur pawh hriat theih a la ni lo.

Manipur Assembly budget session hi July 10 thleng neih a ni ang.

Kum 2015-16 chhunga sorkarin sum hmuh zat tura a ruahman chu cheng vaibelchhe 9602 a nih laiin, a hmanral tur zat hi cheng vaibelchhe 9728.61 tura chhut a ni a, sum indaih lohna hi cheng vaibelchhe 126.42 a tling.

Sorkar laipui chuan kum 2015-16 chhunga state plan hnuaia sum hman tur atan vaibelchhe 3950.92 a pawmsak a, mahse sum hmanral zat tura chhut hi vaibelchhe 3954.88 a ni thung.

Ibobi chuan state plan fund hi Central Plan Assistance-in 56% thleng a tum dawn tih a sawi. A bak chu sum an puk leh, state-in sum a lakluh te, central tax aṭanga an state-in share an neih ve aṭang tea tum a ni dawn tih a sawi.

Manpiur CM chuan sorkar laipui chuan plan­ning, state-te hnathawkna kawnga puih dan, Central Sponsored Scheme hnuaia state leh central intum sem dan turahte thil a thlak danglam vak tih a sawi.

Manipur hian special category state a nih ang­in Normal Central Assis­tance, Special Category Assistance leh Special Plan Assistance hnuaiah plan fund hi a dawng ṭhin a, kum nga kalta chhung khan cheng vaibelchhe 9,000 vel a dawng a ni.