Gogoi-a'n Union Minister te thusawi a pha

Sorkar laipuiin fund ṭha­hnem tak a pe anga Assam tlawhtu Union Minister te'n an sawi ṭhin chu Chief Minister Tarun Gogoi chuan thu dik lo a ni, a ti.

"Assam-in central fund ṭha­hnem tak a dawng ṭhin tih Union Minister te'n an sawi ṭhin chu an bansan a ngai a, mipui hruai kawi tumna a ni. Sorkar laipuiin fund tam tak min pek chu khaw nge a kal zawh tak?" tiin Gogoi chuan a sawi.

Union Minister te chu mipuite hnena zirtirna dik lo petu a nih theih loh thu sawiin Gogoi chuan sorkar laipuiin Centrally Sponsored Scheme (CSS) hnuaia fund a pekte chu a tihtlem zawk thu a sawi bawk.

"Assam tlawhtu Union Minister te'n CSS atana fun­ding pattern chu 90:10 a la ni reng tih an sawi ṭhin a, mahse thu dik zawk chu Assam leh hmarchhak state dangte'n state dangte aia kan hnufual zawk avangin Special Category Status-a min dah rih turin kan la dil chhunzawm reng a ni," a ti.

Union Minister te'n Assam tana thil ṭha an tiduh a nih chuan ṭha a tih thu Assam Chief Minister chuan a sawi a, mahse ṭawngkama ṭanpuina ringawt erawh an mamawh loh thu a sawi.

Gogoi chuan special cate­gory status-a dah chhunzawm zel turin Union Finance Minister Arun Jaitley a ngen tawh thu leh central scheme hrang hranga central share titlem lo tura a ngen thu a sawi.

Madhya Pradesh Chief Minister Shivraj Singh Chouhan-a kaihhruaina hnuaiah 'NITI Aayog sub group of chief ministers' in central schemes kalpui dan tur leh CSS hnuaia funding pattern thar a ngaihtuah mek a, hei vang hian Union Minister te chu dawt hmanga mipuite hruai kawi tum tawh lo tura a duh thu Gogoi chuan a sawi bawk.