Myanmar Army chief a rawn zin dawn

National Security Advi­ser (NSA) Ajit Do­val-a'n tun hnaia Myanmar a tlawh chu sorkar laipui chuan hlawh­tling a tih thu tar­langin Myanmar Army chief-in thla tharah India tlawh a tum thu a tarlang.

India leh Myanmar hian hmarchhak hel, Myanmar rama inkulhte chungah ṭangruala beihpui thlak tumin, thawhho an tum a ni.

NSA Doval chuan Myanmar a tlawh ṭumin Myanmar President leh hruaitu dangte hmuin, hmarchhak helte'n buaina an thlen dan a sawipui a, helte dolet kawngah Myanmar thawhpuina a ngen nghal a ni, tiin Ministry of Home Affairs (MHA) official chuan a sawi.

Myanmar chuan helte avanga India harsatna tawhte a hriatthiampui thu leh hei vang hian an ram Army hotu pawhin India-a rawn zin a tum thu a sawi.

Helte laka beihpui thlak kawngah Myanmar chuan India thawhpui duh mah se harsatna hrang hrang a nei a, mahse a sipaite chu hmarchhak ramri biala dah belh a remti bawk tiin official chuan a sawi. India pawhin ramri biala venhimna khauh zawka kalpui a tum thu leh ram pahnihte'n ramri chhehvela venhimnaah an thawhho chuan helte chet dan an tihnep theih a beisei thu a sawi.

Hetihlai hian hmar­chhak helte laka beihpui thlaknaah official pakhat chuan Myanmar hian India a thawhpui dawn em tih a la chian loh thu a sawi thung a, Myanmar Army Chief lo zin hunah chauh tihfel a nih tur thu a sawi.

MHA official chuan hmarchhak biala Myanmar ramri ven­himna zirchiang turin sorkar laipuiin Task Force a din tawh thu a sawi bawk a, report an thehluh thuai a beisei thu a sawi bawk.