Chi inthliarna tuarte tan Manipur-in lawyer panel din dawn

Manipur sorkar chuan an mi leh sa New Delhi-a chi inthliarna lam hawia tihduhdahna leh tharum thawhna tuartute tan lawyer a chhawrsak dawn.

State law and legislative affairs department-a Joint Sec­retary June 16-a thuchhuah a siamah he thu hi a tarlang a, hemi atan hian state sorkarin lawyer 11 telna panel siam a tum thu leh panel-ah hian hmeichhe lawyer pawh ruat an nih tur thu a tarlang.

Panel member Lenin Hijam chuan sorkar aṭanga official-a ruatna lehkha a la hmuh loh thu sawiin, mahse lawyer panel chuan tihduhdah tuarte FIR thehluh leh court-a thubuaite a bawhzuisak tur thu a sawi.

Delhi-a social activist N Hanghal chuan Manipur sorkar hmalakna chu lawmawm a tih thu sawiin, "Hmarchhak mi, a bik takin Delhi-a chengte'n an dikna chanvo an hrechiang lo hle a, hetianga state sorkarin hmalakna ṭha a nei hi a lawmawm tak zet," tiin a sawi.

All Manipur Muslim Girls Students’ Union pawhin sorkar hmalakna chu ṭha tih thu a tarlang a, chi inthliarna tuartute tan rorelna dik hlenchhuahna rintlak tak a nih ngei a beisei thu a tarlang.